الجولة التانية
النهاردة كانت الجولة التانية فى معرض الكتاب...استغرقت منا أكتر من 3 ساعات معظمهم فى سور الأزبكية ...أول مرة نقضى وقت طويل كده هناك بس كنا مقررين ان احنا نصبر عشان نطلع بحاجة كويسة.....!!!!
طبعا هو كركبة جامد بس الحمد لله الجولة أثمرت...و طلعنا بشوية كتب و روايات و كدة....الأسعار اللى اشتريت بيها مرضية نسبيا...بس بصراحة أنا أصلا مش خبيرة فى أسعارهم فممكن يكونوا ضحكوا عليا...زائد انى مش بعرف أفاصل زى الناس فى العادى....وطبيعى أنى مش حعرف أفاصل فى الكتب و الثقافة....بحسّها غريبة علىّ!!!
طبعا خلال الجولة تلاقى واحد واقف عند الكتب
قرب قررررررب قرب...الكتاب كان بيتباع بعشرين...احنا بنبيعه بمعرفش كام.....قلّب قلّللللللب قلّب.....!!!
كل حاجة هنا بجنيه.....!!!
و تلاقى واحد فاتح موسيقى تشيع أجواء الثقافة و الرقى
أيظن ترم ررم رم ترم....!!!!
واحد تانى... واقفة بقلّب الكتب عنده فمسكت كتاب بطرس غالى خمس سنوات فى بيت من الزجاج...فيروح قايل....الراجل قال كلمة حق شالوه..!!!
ييجى واحد بيشترى لسة داخل فيدخل فى الحوار يقولله ...مين ده؟!!!
فالبياع يرد: بطرس غالى
فالراجل يقول : طيب ده زمان...ايه اللى فكركوا...؟!!
البياع التانى يدخل فى الحوار: راجل كويس...تفتكروا بايه...ها تفتكروا باييييه..هااااا؟!!
و تحس انهم محتدين على بعض فى الكلام ...و شوية و حياتخانقوا....!!!
طبعا ده غير الأماكن اللى تلاقيها زحمة...تروح تبص تلاقى لعب بلاستيك غريبة كدة...أكيد الصين... يعنى اللى مغرّقانا بخيرها و شرّها...أو مجلات غريبة مريبة قديمة ....!!!
و قدّام البياعين دول فى أماكن كدة بتبيع الشرايط و السيديهات الاسلامية و المسيحية....ربنا مبيحرمنيش من سماع أغنية راقية (راجع الجزء الأول...أغنية النهاية..الدبة وقعت فى البير)...و اذ بى أسمع أغنية...تقريبا هى للأطفال و بتنمى الوازع الدين عندهم.....(و عشان ربك يرضى عليك ...حاجات كتير لازم تعملها....!!!)...لحد هنا مفيش حاجة...بس اذا اقترن الكلام بالصوت الفظيع مع الموسيقى المفزعة المأخوذة عن سيمفونية "قوم اقف وانت بتكلمنى"...للمبدع بهاء سلطان....!!!...هنا بس تبدأ تحس الصدمة...و لما تدخل على باقى الكلام اللى فيه سلاح و حرب و معرفش ايه...ممكن يجيلك انهيار عصبى رسمى ...و تقرر انك تفر منقذا البقية الباقية من أعصابك....!!!
تعدينا المرحلة دى...و قررنا أن احنا نمشى...عشان كفاية كدة...زائد انى بدأت أتعب كالعادة يعنى....فخرجنا المرة دى من الباب التانى ناحية ممدوح سالم باين....هناك تلاقى بيع البلالين و اللعب على أشدّه....و كان منها حاجة طويلة كدة...مكتوب عليها بالونة بكار....و غيركدة من كراكيب الصين!!!
الى هنا انتهت الجولة التانية من جولاتى فى نعرض الكتاب...و للحديث بقية مادام فى العمر بقية....!!!
1 comment:
الشعب المصرى بيهيس
Post a Comment