صباح الخير يا مصريين ....ياللى تحت البطانية نايميين...و شادين اللحاف و دفيانين....و باللى حواليكو ما داريانيين....!!!ا
حتقولوا طيب ايه لازمة الكلام السخيف ده دلوقتى؟!!!ا
حقولوكوا التعديلات الدستورية اللى عليها الكلام فى البلد اليومين دول...!!!ا
حتقولوا كدة الكلام بأه سخيف بجد...و بعدين ما كل الناس عارفة أن فى تعديلات دستورية...سواء تحت البطانية أو فوقها.....شافوا النشرة و قروا الجرايد ...وداريانين و كلو تمام.. ايه الجديد يعنى...!!!؟
اجيلكوا بأه فى الكلام الجد....من ناحية نايمين الى حد كبير كلنا تقريبا نايمين و أنا برده مش صاحية قوى....يعنى كل كل واحد واخداه دوامة الحياة....الدراسة...الشغل...لقمة العيش...تربية العيال...أو حتى مشغول فى اللاشئ.....!!!ا
و الدليل على اننا نايميين ان الناس مش عارفة الدستور أصلا فيه كم مادة؟....و كم مادة طرحت للتعديل؟...و ايه التعديلات المقترحة؟...و ايه المراحل اللى حيمر بيها عشان يتعدل ؟!!!....و العملية دى كلها تاخد وقت اد ايه؟!!!...و ايه دور الأحزاب و المجتمع المدنى و الشعب و نواب الشعب فى القصة دى كلها؟!!!...و ايه التأثير المباشر على حياة الفرد و المجتمع و مستقبل البلد على المدى القريب و البعيد؟!!!...و أسئلة كتيرة من النوع ده كلنا تقريبا تايهين عن اجاباتها الأكيدة....!!!ا
طيب كدة بدأنا نصحصح و نكتشف ان احنا مغيبين فعلا...بس برده مش عارفين ايه المطلوب!!!ا
يمكن أنا نفسى تايهة فى الموضوع...بس قلت أفتحه بدرى بدرى عشان نصحصح بعضنا و اللى عنده حاجة يقولها ...بس يا ريت بلاش يدلى بجردله و يفتى....أحسن الموضوع مش ناقص توهان....!!!!ا
بصراحة أنا مش متفاءلة-مش جديد عليه يعنى-...بس خلينى أقول ليه؟!!!....أصل اللى سمعته ...من ضياء رشوان -مش فتى يعنى-ان المفروض ان السيناريو ان المواد دى تدخل مناقشات فى مجلس الشعب و بعدين....و هنا يبدأ دور الشعب على أساس هما عارفين النواب بتوعهم و لو حد ليه رأى يوصلوا للمجلس عن طريق النائب اللى تبعه...طبعا المواطن حيكون ليه رأى على أساس أنه قرا و فهم المواد المعقدة فى الصياغة و اللى محتاجة متخصصين....بعد الحوارات دى تيجى المحطة المهمة وهى طرح التعديلات دى فى استفتاء شعبى- زى أيام مادة 76- ...يصوت فيه الشعب بنعم أو لا على كل المواد...يعنى حتاخدها كلها أو تسيبها كلها...فلو مش عاجبك شوية وعاجباك الباقى حتضطر تضحى بحاجات....!!!ا
ده السيناريو المطروح....طيب تمام....مش متفاءلة ليه بأه....!!!؟؟ا
مش متفاءلة لكذا سبب
بداية زى ما قلت الناس واخداها دوامة الحياة...و محدش مهتم ولا واخد بالو....و اللى واخد بالو مش فاهم ولا لاقى حد يفهمه ببساطة ايه الحوار كله....يعنى برده منقدرش نلوم الناس على طول الخط....!!!!....مع أن فى فرنسا لما كان فى استفتاء على قانون معين...مش فاكرة دلوقتى ...بس تقريبا قانون العمل...كنت تلاقى الفلاح و الحرفى و كل الفئات فاهمة و بتتكلم فى الموضوع و ووجهة نظرهم فيه..و على أساس ايه كونوا الرأى ده....ممم...شكلى سرحت كده و نسيت ان احنا فى مصر !!!ا
المهم نرجع تانى لموضوعنا
من ناحية الشعب و النواب مفيش العلاقة دى أصلا...ده على افتراض أن المواطن عارف مين النائب عن دايرته....!!!ا
و من ناحية الاستفتاء....الغالبية معندهاش بطاقة انتخابية-أحب أقول أنى للأسف منهم-و اللى عنده مش فاهم أو مريح دماغه على أساس أن مستقبل البلد وجع دماغ....أو مش واثق فى العملية ..أو مش حاسس أنها حتأثر على حياته!!!ا
أما من ناحية الأحزاب ...على أساس أن فى أحزاب أصلا...و المجتمع المدنى....و الاخوان... عندى احساس قوى أن عمر التعديلات فى كل المواد ما حتكون مرضية بالنسبة ليهم...و لا حتكون قريبة من طموحاتهم...و بالتالى حيرفضوا يقولوا نعم أو لا على مجمل المواد و ممكن يقاطعوا التصويت ...و تمشى الليله زى أيام 76....!!ا
يعنى ده كان شوية كلام من واحدة تايهة فى الموضوع...و زى ما قلت أنا بفتح كلام لعل و عسى نقدر نصحى و نفهم أكتر....!!!ا
و فى النهاية أحب أبعت رسالة لكل مصرى و مصرية و أولهم أنا...
أصحى يا نايم....!!!!ا
أصحى يا نايم....!!!!ا
2 comments:
هااااااااااوووووووم
مين بس اللي شد اللحاااااااااف
--------------------
أولا لا ننس ان التلفزيون أعلن أن الدستور كتاب وطن
و كلام التلفزيون على عيننا و راسنا من فوق
ثانيا الدستور في الفترة الحالية مابقاش محتاج متخصصين
بقى محتاج ترزية
ثالثا جديد الدستور هو زي ما قال أحدهم هو ترقيع في خرقة مهلهلة اصلا
--------------------
نتكلم جد شوية
الدستور المصري هو تقريبا أكثر دساتير العالم تعرض لعمليات ابادة و تعديل و اعادة ولادة
و المعروف ان أخر تعديل طال الدستور قبل تولى مبارك الحكم
و اللي ساعد مبارك على طول الانجعاص على الحكم هو التعديل اللي أجراه الراحل السادات بتحويل كلمة الولاية مدتين لكلمة مدد أخرى
دستورنا ينص على ان مصر جمهورية عربية اشتراكية الاسلام مصدر التشريع الأساسي فيها و لغتها الرسمية هي اللغة العربية
الدستور فيه مواد كتير توصل العلاقات بين السلطات التشريعية و التنفيذية و تنظيم اسس التعامل مع واجبات و حقوق المواطن المصري
يعني المفروض ان كل علاقة للفرد مع الجهات المؤسسية في مصر تكون هناك مواد دستورية تحكمهاو لسيادة القانون سلطة الفصل بين الفرد و تلك الجهة
هتلاقى مواد تحكم العمل النقابي و الطلابي و التشريعي و القضائي و خلافه
الدستور فيه قوانين معروفة للناس لانهم بيشوفوها في حياتهم على فترات متباعدة
زي ال 50% من عضوية مجلس الشعب للفلاحين و العمال (ايام الثورة) و حل جماعة الإخوان المسلمين و نظم الاستفتاءات و اللي منهم الاستفتاء اللي اتعمل ايام تعديل المادة 76
هتلاقي برضه مواد من الدستور تتحدث عن الوحدة بين مصر و سوريا و الغاءها عطل الكثير من الاجراءات اللي اوقفت شكل الحياة السياسية و استشراء الفساد زي توقف قانون محاسبة الوزراء و غيرهم
الدستور بيواجه تحديات قوية زي انتشار نظم الرأس مالية و الخصخصة و اللي بتعارض بعض مواد الدستور
غير طبعا المواد اللي بتحط في ايد رئيس الجمورية شرايين الحياة المصرية و دي من الاسباب اللي خلت في صداع في رأس الظام المصري اتجاه نداءات تعديل الدستور
التعديلات الجديدة اللي سمعنا عنا تختص بتعديل 32 مادة و حذف و اضافة مادتين مع انتظار تعديل مفترض لما يضعوا قانون مكافحة الارهاب بدلا من قانون الطوارئ
ال32 مادة في منهم مش مؤثرين تأثير مباشر على الشعب و مش مهمين للدرجة لكن الكارثة تحت 3 عنوانين
الاشراف القضائي على الانتخابات و حل البرلمان و تعديل لشكل الهيئة القضائية
طبعا التعديلات كارثية لانها تحاول منع الاشراف القضائي على الانتخابات مقابل عمل لجنة أو هيئة مشرفة بالتعيين و دي اللي تقصم ظهر المعارضة اللي كان الاشراف القضائي سند ليها لاقتحام البرلمان و ايضا سند بالحركة الاخيرة للقضاة في وجه النظام
و تعديل حل البرلمان بدلا من الاستفتاء الشعبي لتأكيد قرار الحل أصبح حل البرلمان بشكل فردي في يد رئيس الجمهورية
و مايش توضيح لمدى الكارثة أكثر من اللي ممكن نتخيله
الاقل كارثية هو اعادة تشكيل الهيئة القضائية تقريبا و اللي الصراحة مش فاهم قوي و اللي مش فارق مادام رئيس اللجنة القضائية هو نفسه الرئيس المتحدث باسم الجهة التنفيذية
و ياريت فعلا نتناقش بشكل أوسع حول دورنا كمواطنين اتجاه اللي بيحصل هنا
I agree wz u ..tht situation of politicall illiteracy is made on purse by the regime and the ploitical elite in order 2 continue their corruption in peace wz no disturbance..in general, the constitution in any arab country can be amended for the sake of one person 9 the ruler )n one night like wht had happened in syria but whenj it comes 2 the interst of the maority, it becomes a holy book tht van never be amended
N.B:tht is my other blog..it differs than the one u visited
http://strugglingmichealitoo.blogspot.com/
Post a Comment