كعادتى لازم كل سنة أروح معرض الكتاب...زى سنّة كدة عندنا فى العيلة يمكن من قبل ما اتولد.....المهم بم انه فتح خلاص كبرت فى دماغى انى أروح أول يوم....خلصت الامتحان و هوب على هناك مع أختى.......طبعا ده الجنان بعينه يعنى..من الامتحان للمعرض...بس قلت أعمل لفّة سريعة كدة و بعدين أروح مرة تانية بعدين!!!!ا
طبعا أنا عارفة من قبل ما اروح حشوف ايه....و عمالة أقولهم من قبل ما يفتح حنشوف كذا و كذا و كذا.... حنشوف الناس اللى جاية تتفسح فى الجناين و خلاص و حنشوف الكشرى و الأكل و العك فى كل مكان....و حنشوف دار كذا فى المكان الفلانى و ممكن أقولوكوا كتب ايه حتكون فين ....الخ.
المهم قالولى طيب السنة دى موبينيل راعى للمعرض و احتمال يحصل تغيير للأفضل...قلتلهم ولو.... دى مسألة سلوك قبل أى حاجة ...بس خلينا نشوف...لعل و عسى.....!!!ا
المهم رحت على الساعة 1.00 كدة...و كالعادة بدخل من باب صلاح سالم و ببدأ الجولة من هناك.....طبعا المدخل الرائع ده غنى عن التعريف ...ناس كتير و كتّاب اتكلموا عنه و محدش عرف الى الأن الحكمة من تصميمه بالشكل الفظيع ده....حاجة كدة غريبة متقسمة لبوابات ضيقة عجيبة و عادة بيكون معظمها مقفول و اللى مفتوح منها قدامه بحر من الزبالة المتمثلة فى التذاكر....منظر حضارى من البداية يعنى......!!!!ا
الواحد يتعدى مرحلة البوابة يلاقى فى وشّه معرفش مين بيوزع ايه....و بتوع ورق الصم و البكم اللى شكلهم أصلا لا صم و لا بكم بس هى مسألة ابتكار فى التسول.....!!!ا
تعدى منهم و خلاص داخل على المكتبات و دور النشر اللى على شمالك....تلاقى شوية مكتبات اللى بيبيعوا فيها كأنهم شاربين حاجة كدة شكلهم مريب أصلا..و يعد ينادى عليك ...غالبا بتكون مكتبات غريبة و مش بتبيع كتب بس...كتب ...سى ديهات...شرايط...و أى حاجة فى أى موضوع.....تكمل كدة شوية تلاقى دار الشروق...دى بأة محترمة و الكتب فيها مترتبة بشكل معقول ...يعنى تشجعك أنك تقف و تبص و تشترى....و هى ليها أكتر من موقع فى المعرض....!!!
طبعا طول ما أنت ماشى تلاقى حد على الجنب بيلعب كورة....ناس عمّالة تاكل فى كل حدب و صوب....ناس غريبة بتبيع حاجات عجيبة..... و الانفجار الفظيع المستمر من سنوات لمروجى الأطلس و معرفش ايه الألكترونى و اللى مش بيسبوك تمشى فى أمان كدة.....و الأفظع بأه أنك تلاقى ميكروفون كدة فى وسط الطريق و طالع منه أغانى عجيبة ...تحس أن ناقص حبّة و تلاقى فى وشّك بتاع التنورة أو رقّاصة عشان الأجواء الثقافية تكتمل......مش بيقولوا الفن رسالة!!!ا
بعد كدة تفكر أنك تدخل على الصالات ...3 و4 و الحاجات دى....تلاقى بعضها عبارة عن كراكيب فوق بعض ...و تحس أن اللى بيبيع بيبيع خضار ..الموضوع شكلو بالكيلو.....و من الظواهر اللى بقالها كم سنة....انتشار الكتب الدينية اللى ممكن يكون زى ما ليه ايجابيات ليه سلبيات...لأن فى دور نشر غريبة و ممكن تكون لم تنل من التنقيح القدر الكافى و الناس تقرا و خلاص.....حاجة تانية كتب أشتاتا أشتوت بتاعت الجن و العفاريت و الحسد و الأبراج و الحظ و البطيخ ....تلاقيها كتير جدا و تحس ان ناس كتير بتقبل عليها و كأنها دى لبّ الثقافة.....و يقولوا الناس بتجيب كتب و الثقافة بتزدهر......مش عارفين ان ثقافة اللاثقافة هى اللى بتزيد....!!!ا
حاجة كمان...أنا بقالى كام سنة بروح....أقدر أجزم أن فى دور نشر بتقبل على الكتب من السنة للسنة و تفتح عليهم وقت المعرض الجديد.....أصل مستحيل أن نفس دار النشر فى نفس المكان بنفس الكتب القديمة المتّربة على نفس الأرفف....بجد بحس أنى بزور نفس المعرض كأنه كان امبارح.....حاجة كئيبة ز غير مشجعة يعنى حتى لو الواحد ليه نفس يخنقوك...و خصوصا لو أنت داخل و لقيت المسئول عن المكتبة أو دار الناشر مش طايقك أو عمال هو و اللى معاه يكلوا فى كشرى و سندوتشات و عك و مش فاضى لحد وكل ده فى صالات المفروض أنها للكتب و بس......!!!!ا
طبعا الرئيس و حرمه كل سنة بيشوفوا ايه فى الافتتاح....صالة العرض الجميلة الرائعة المنظمة الواسعة...اللى مفيهاش ترابة واحدة...بس مش بيشوفوا الصالات اللى قربوا البياعين فيها يقولوا بجنيه و نص تعالى و بص....و لا كل الحاجات العجيبة الغريبة المريبة اللى بتحصل....عشان كدة بيخرجوا فى منتهى السعادة ويشيدوا بكل ثقة بالمعرض و التطور الرائع اللى فيه و ازاى أنه فى مصاف المعارض الدولية الكبرى زى فرانكفورت أو غيره.....!!!ا
المهم احنا مكمالناش ساعتين...و بدأت أتعب "كويس أنى صمدت بعد الامتحان أصلا"...فقررت أنى أمشى بس كان فى كام حاجة كدة قلت حروح أجيبهم من دار الشروق....و أنا بدفع و بستلم زاد الاعياء فقلت طيب أقعد برة شوية لحد ما أختى تدفع و تشوف حاجة و نمشى....و أنا مستنياها و خلاص بقى حيغمى عليه ألاقى أصوات فظيعة....نشاز نشاز يعنى.....
الدبة و قعت فى البير و صاحبها راجل كبير..... و بتاكل و تقول جعانة....الدبة وقعت فى البير و لهذا موقفها خطير....!!!!!!!!!!!!ا
هنا بقى لقيت أختى جاية فى وشى و احنا الاتنين عمالين نضحك....و رحنا قايمين و روحنا قبل ما يغمى عليه بجد.....!!!!ا
الى هنا انتهت رحلتى الأولى للمعرض..... و ان شاء الله متكونش الأخيرة بس ربنا يدينى الصحة و الصبر .....!!!ا
----------------
بالمناسبة
لو حد قرا كتاب جامد ...أو فى كاتب عارفه ممكن يكون مميز بس مش مشهور...أو دار نشر فيها اصدارات كويسة...تبقى حاجة كويسة أنه يقول عليها....يعنى ساعات فى حاجات بتبقى كويسة بس مختقفية فى وسط الكركبة أو مش مشهورة بالدرجة الكافية.....!!!!ا
شكرا مقدما
6 comments:
looooooooooooooooooooooooooooool.
nefsee kontee takhdee laffa fee soor el azbakeya(elli fel ma3rad).da ba2a betla2ee konooz ta7t el atlal,tela2ee el ragel 3ando charles dickens we shaksp.,we kotob momken matla2eehash fee ay 7etta,bas beybee3 bel baraga,3ayza bekam???,ya3nee ana elli ba7aded el se3r,we law shafek malhoofa 3ala el ketab,momken ye2olek 100,we law shafek mehs mohama,tela2ee el ketab ba2a be 5 geneih,7aga fe3lan kemet el maskhara < <
yeah,..i know...ro7t last year,..bas agelt el gawla fih lel mara el gaya ISA,...howa el mawdo3 me7tag sabr we se77a we tarkiz 2 get whatever u want men 3'er ma yo3'man 3aliky ;; zayee keda....!!!
bas yemken dol a7san men el halls elly 3amla nafsaha betrateb we ma3rafsh eih,..we homa mekarkebeen el denya fo2 ba3daha,...@ least dol 3arfeen 3andohom eih ta7t el ankad ....!!
و اللة شوقت الواحد يروح......أهو منها ضحك و مين عارف يمكن أطلعلي بكتاب حلو
la2 akeed el wa7ed moken yetla3 be 7agat kowayessa,...bas akeed bardo lazem yetla3 be shwayet shalal ma3ahom ;;
لولا ان الوالدة بتجيب لي دعوات مجانية كان ممكن ما أروحش
مش علشان التذكرة غالية و للا حاجة لاسمح الله
بس علشان انا لو وقفت في طابور التذاكر و بعد كده طابور الدخول ممكن يكون المعرض بتاع السنة اللي بعدها بدأ
يعني العيب مني مش من المعرض
لا خلاف على اللي قلتوه عن المعرض الدولى ده بس بالذمة مش كان يبقى ممل لو لقيتوه كل سنة مختلف عن اللي قبلها
يعني فوق كل اللي بيحصل و كمان يكون في تغيير
لا لا لا لا
و كل اللي بتقولوه ده يصب في مصلحة المعرض مش العكس
ده مثال للمعرض الشامل
يناسب جميع الأذواق
بس انا متضايق
كده تحرقوا المعرض على قبل ما اروح
كده هفقد لذة الاستمتاع بالتكرار
الله يسامحكم
la2 ,..dnt worry,..dayman 7atla2y 7agat mozhela,..we talama enta ro7t abl keda,..yeb2a akeed motawake3 7atshof eih...bas it's always beyond ur expectations!!!
----
bas 3ala fekra kan fady fe3lan youm el 7'amis,..ba3d 7adset el field 3alatool :s,...makansh fy za7ma odam el shababek :D
bas ta2reban el tazkara 3'elyet bayen 8-),..ba2et be geneh ,..i guess eny as a student kont badfa3 50 ersh....yalla heya gat 3alihom...!!!
Post a Comment