ايوة كدة ربنا يهديكى.....!!!!!ا

من حوالى سنتين كدة كنت بتكلم مع واحدة صاحبتى....و بعدين
قالتلى : شوفتى الكليب اللى فيه موديل محجبة؟
قلتلها:لأ أصل أنا ماليش فى القعدة قدام الأغانى....يعنى بشوفها صدفة...!!
فقالتلى و هى بتضحك قوى: بس شكل المغنى متأثر بالمدرسة....أصله تقريبا كان عندنا فى المدرسة....معرفش أستاذ مين قال كدة....!!!ا
قلتلها:ما شاء الله على انتاج المدرسة.....!!!ا

المهم بعد كام يوم كان فى برنامج و كان فى المغنى و جابو الأغنية فشفتها.....فقلت يعنى خلاص حبكت.....و بعدين هو و المخرج قعدوا يقولوا احنا مجبناش حاجة من عندنا ما دى صورة موجودة فى المجتمع.....و بصراحة كان عندهم حق....يعنى فى أفشل من كدة كمان..... فمحدش قدر يزود فى الانتقاد....لأن هما فعلا مكانوش بيخترعوا حاجة......مناظر شافوها فى الواقع و نقلوها فى كليب......!!!ا

كليب من ضمن الاف الكليبات خد وقته و هيصته و خلاص.....!!!ا

-------

المهم اللى فكرنى بيه كليب تانى شفته من اسبوع....برده فيه حوار الحجاب بس على أوسع ....و يمكن ده اللى كان مستفز و هو النقطة الأساسية حتكلم فيها.....!!!ا
هو الكليب بردو حصرى على ميلودى....و بما انى مش بشوفها الا لو فى مكان يعنى و مفتوحة فعمرى ما شوفت الكليب ده الا لما اتعرض فى برنامج كان بيقول ملحوظة عنه....و يمكن أنا لاحظتها برده....!!!ا

هى الأغنية مبدئيا لمغنى مجهول الهوية....أو خلينى أقول بالنسبالى عشان يمكن يكون معروف فى الأوساط الفنية.....و بيقول ايه بأه فى المطلع

اتحجبتى برافو عليكى.....أيوه كدة ربنا يهديكى......!!!!!!!!!!!!!!!!!!!!!!!!!!!!ا
و شوية كلام تانى طبعا مش فاكراه....!!!ا

(جدير بالذكر أن المخرج هو ياسر سامى....اللى زى ما أخرج الأغنية دى...و طلع البدر علينا....أخرج لسعد الصغير و العسيلى و ناس أكثر ضياعا)ا

فى التصوير بأه فى شوية مشاهد كدة....واحدة جاية من السفرمحجبة فعملت مفاجأة لجوزها و لا معرفش مين.....واحدة تانية برده عملت مفاجأة لحد معرفش هويته ايه......و بعدين مشهد تانى....بنت صغيرة 7 سنين مثلا لابسة اسدال صلاة فى البيت...و مامتها بتتفرج على أغانى أو حاجة كدة....فتيجى البنت تمسك الريموت كونترول و توطى صوت التلفزيون أو تقلبه و مامتها قاعدة عشان البنت تصلى...فالأم اذ تتأثر و تطفى أو تتحجب....مش فاكرة......!!!!!!!
بعدين بأه المشهد الفظيع.....مدرس فى فصل بنات أخرهم 7 سنين....وواحدة فيهم محجبة ...فيقرب منها المدرس بابتسامة عريضة و يديها شيكولاتة.....!!!!!!!!!!!!!!!!!!!!!!ا


طبعا ممكن حد يشوف ان عادى....بالعكس حاجة كويسة و الكلام ده.....بس أنا شايفة أن الموضوع وان كان باين أنه مجرد أغنية عابرة لمغنى عابر.....الا أنى شايفة أن كليب زى ده بيعكس اتجاه عند بعض الناس لتعميق اختزال الدين فى المظهر ....طبعا مش بقول أنه مش واجب أو حاجة مهمة.....لكن عمل أغنية بالشكل ده مع مشاهد زى دى فى الكليب بيقدم الحجاب على أنه شوية لبس ظريف أو موضة و أنه رمز الهداية المطلقة و ده شئ مش حقيقى....لأنه و ان كان واجب فعمله لا يعنى نهاية الكون و بلوغ أقصى الدرجات.......!!!!!

الحاجة الأهم بأه أنه بيوصل رسايل غلط فى مشهد الأطفال ....يعنى مين قال أن بنات عندهم 7 ولا 8 سنين ....يكون فى أفضلية لواحدة فيهم عشان لابسة حجاب.....فى حين أن اللى مش لابسين مش مقصرين بأى شكل من الأشكال لأن هم مش مكلفات أصلا فى السن ده....!!!!!ا

الى أخر كل المفاهيم الغلط و الرسايل اللى بتتبعت من خلال التلفزيون.....و قد تؤثر على بعض الناس لا اراديا......!!!ا


يمكن زى ما قلت الناس تشوف الموضوع ده هايف....بس أنا شايفة أنه من مظاهر التخبط اللى موجودة فى المجتمع على مختلف الأصعدة....الشخصية...السياسية...الاجتماعية....و أكيد الدينية اللى بتظهر فى حروب اختلاف الأراء .......و اثارة البلبة باستمرار.....و انتشار التطرف سواء بالتشدد أو الانحلال....و انحسار الاعتدال.....الخ....!!!ا


تعليق نهائى على الأغنية أو على المفهوم اللى فيها

بسم الله الرحمن الرحيم

يا بني ادم قد انزلنا عليكم لباسا يوارى سواتكم وريشا ولباس التقوى ذلك خير ذلك من ايات الله لعلهم يذكرون

صدق الله العظيم