التاج علينا حق....!!!ا

كنت بشوف التاج فى مدونات أخرى ...و مش عارفة صراحة كان اختراع مين ....و سماه كده ليه.....بس واضح انه لازم فى يوم من الأيام يوصل للمدونة بغض النظر عن حجمها أو تاريخها......ما علينا......!!!

المهم أنا أصلا لما بتكلم لوحدى ممكن اطلع كلام....بس لما بتسأل مش بعرف أبعبر....أو بجاوب اجابات مقتضبة .......بس يعنى بما ان التاج جيه ...أحاول أجاوب على قد ما أقدر......!!!!ا






بسم الله الرحمن الرحيم


انت مين؟

كائن حى دماغه راكبة بطريقة غريبة نسبيا.....!!!


مين أكتر 6 أشخاص بتحبهم؟

هما 6/2
والدى و والدتى و أختى


انت سعيد؟

مممم....سؤال مش مظبوط لأن مفيش حد بيدوم على حالة مزاجية واحدة....و مع ذلك لو لازم أجاوب
فللأسف مش قوى بقالى فترة طويلة....و يمكن دى أكتر حاجة مضايقانى لأنها تعتبر نوع من عدم الرضا
:(


لو اجتمعت انا وحسني مبارك في غرفة واحدة؟

ممكن مقولش حاجة خالص عشان مش بحب الرغى و كلام الانشا مع ناس كدة
و ممكن ألاقى نفسى رميت كلام غريب و تقيل
بس فى الأغلب مش حقول حاجة.....!!!
<-<



لو معاك مليون ونص جنيه......تعمل بيهم ايه؟

أعمل صدقة جارية بجزء
ممكن أعمل مشروع عشان يبقى استثمار و فرص عمل و تنمية و كدة
ممكن حاجات تانية....بس ساعتها أبقى أناقش الموضوع مع أهلى



بتحب مصر؟

ممم....مقدرش أقول أنى بكرهها....أكيد هى بتبقى حاجة جوة الأنسان أنه يحب بلده....بس مجربتش أكون بعيدة عنها لفترة كبيرة عشان أعرف أنا بحبها أد ايه......يعنى عادى و لا فوق العادى......!!!!


بتحب البنات؟

يعنى أعتقد السؤال ده ليه وجهة نظر معينة.....بس على كل حال هو سؤال مطاط برده......لأن مينفعش حد يتسأل بتحب فئة على وجه الاطلاق.....كل فئة جواها أنواع لا حصر لها....و بالتالى أنا بالنسبة لى مش بيكون لى رأى عن فئة معينة لأنها بتقع فى خطأ التعميم.....و حتى كل شخصية ممكن أحترم فيها جزئية معينة و ان اختلفت أو اتفقت معاها....سواء كانت تنتمى للبنات أو الولاد أو حتى كائنات فضائية.....!!!



انت مسلم؟

الحمد لله

ليه؟

الطبيعى أن الواحد بيتولد مسلم
بس بعد ما كبرت و وعيت الحمد لله ....أعتز بانتمائى للاسلام


مين اكتر شخصية ما تقدرش تستغنى عنها في حياتك؟وليه؟

والدىّ
بالشدة :) والدى و والدتى يعنى
هما كل حاجة فى حياتى....و هما اللى بيعملوا توازن فيها....و تقريبا الوحيدين اللى فى الكون اللى ممكن يستحملوا شخصية زييى :)

ايه اكتر موقف محرج اتعرضت ليه في حياتك؟واتصرفت ازاي؟

مممم....لما اتحطيت فى موقف انى أحرجت حد


:sماتصرفتش
-----

بس برده افتكرت موقف محرج كدة و أنا صغيرة....يمكن 6-7 سنين....مش فاكرة بس كان موقف مسخرة و يمكن حتى أهلى ميفتكروش ...بس أنا فاكراه كأنى شايفاه....!!
أنا فى حاجة غريبة كدة...أنى بعرف الناس من جزمهم......يعنى لو شوفتها قبل وش الشخص ...غالبا بعرف هو مين....محدش يسأل ازاى ولا ليه ....هو كدة و خلاص :)
المهم و أنا صغيرة كنا فى محل دورين و بابا كان مش جمبى يمكن فوق أو حاجة.....و بعدين ببص على السلم و قبل ما أشوف وش الشخص شوفت جزمته -اللى على مستوى نظرى يعنى :)- و يمكن كانت شبه بتاعة بابا ...فقولت بابا..... و بصيت لقيت حد تانى....كان نفسى الأرض تنشق و تبلعنى
;;

ايه الأمنية اللي بتدعي ربنا دايما انه يحققها لك؟

اللهم استخدمنا و لا تستبدلنا

اللهم اجعلنا خير دعاة لخير دين قولا و عملا
(و عملا بالنسبة لى أهم)

اللهم لا تردنا الى أرذل العمر
(أطمع فى حياة قصيرة....ان كان فى ده خير لى)


تمرر التاج دة لمين؟

sarah la tulipe rose
لو تحب
و لو خلصت امتحانات :)
و رجعت تكتب تانى