من أكتر من سنة -على وجه التحديد- و أنا مش قادرة -للأسف الشديد- أنى ألمس الجوانب المشرقة فى الحياة أو الناس من حواليه بشكل كبير......أو فى القول الدارج أحيانا الجانب "البمبى" ....نادرا ما بيحصل......فى ناس بيسموا الكلام ده تشاؤم....و أنا بسميه واقعية.....أو بمعنى أصح اغراق فى الواقعية....!!!
المهم مش دى القضية...و لا ناوية اتناقش فيها و لا ده مجالها....لأن احنا هنا فى البلوج البمبى......!!!ا
ايه هو البلوج البمبى؟
البلوج البمبى هو محاولة لتسليط الضوء على الجوانب البمبى :) أو المشرقة اللى أنا مش قادرة أشوفها...و ده من خلال الأخرين....بمعنى أصح عايزة أى حاجة تدينى أمل فى الحياة.....بس...و 1000 خط تحت بس.....مش عايزة مواضيع انشاء و شعارات أو كلام عام ومسلمات....يعنى مش نظام "دايما فى أمل طول ما احنا عايشين.....و لو بطلنا نحلم نموت .....الخ" .....!!!ا
فى الواقع أنا معنديش اطار معين فى دماغى عن شكل البلوج أو المسار اللى حياخده ة ولا أى حاجة خالص....هى فكرة مبهمة فى دماغى بقالها فترة و أول ما لقيت أنى أعلى من قاع منحنى حالتى المزاجية بكام ملليميتر قلت أحط الفكرة قبل ما أنزل تانى و مقدرش ساعتها أتقبل أى حاجة.....!!!ا
ياللا بقى....عايزة أشوف ردود بمبى :)....بس يا ريت تبقى واقعية :)....يمكن تفرق فى حالتى الميئوس منها دى !!!ا
--------------------
بمناسبة البلوج البمبى....و أنا بفكر فيه اتبعتلى بانر من تصميم بلوجرصمم شوية بانرز لبعض البلوجز...و كان منهم بلوجى المتواضع......و بما أن البانر مشرق و و فيه وردة بمبى :) فقررت وضعه لفترة تزامنا مع البلوج البمبى .....و شكراللزميل البلوجر و المصمم الهاوى
:D
البانر تصميم
kimexlilo
صاحب بلوج: نور على الدرب...فأين هو؟
3 comments:
لا انا كده ازعل ماما حببتى كفايه انك تعرفينى علشان تبقى حياتك بمبى عيب عليكى
بهزر طبعا هفكر واكتب بكره علشان انا بنام على الكى بورد
هي هي هي هي
دا أنا
:$
-------------------------------
و الله بالنسبة للبمبي فه حاجات كتير
يعني مثلا و بدون ترتيب أهمية لما من يومين شفت في الصفحة التالتة من جريدة الأخبار تحقيق صفحة كاملة عن طلاب عندنا في الكلية عملوا روبوت مصري 100% و كمان مسابقة كبيرة ومهمة حسيت ان الدنيا ممكن تكون بمبي و ان في كليتنا ناس بتعمل شغل و بتنجح فيه
و برضه لما بسمع عن حاجات زي
ACES
ناجحة و الناس مبسوطة منها دي برضه حاجة لونها بمبي . يعني النجاح موجود لسة و ممكن
و برضه كان في شركة اسمها خيال للألعاب الترفيهية " اللي عملت بوحة" و دول أربع شباب و شافوا فكرة مش متنفذة في مصر و حاولوا يعملوها و نجحوا و بدعم من أجهزة في الدولة و ده يخلي الحياة برضه بمبي.
ده مثال على مستوى النجاح مثلا
لما بلاقي كتير من اصحابي او زملائي ماشيين جامد في موضوع العمل الخيري و التطوعي و بينجحوا بشكل ملحوظ في تحقيق اهدافهم المطلوبة بحس ان الدنيا لونها بمبي زي صاحبة الكومنت اللي فوقي و زملاءها في الكلية في موضوع خير كتير او علشانك يا بلدي و غيره و غيره
و زي تجميع الورق و الادوات و بيعه و شنط رمضان و غيرهم كل ده بيحسسني ان لسة الناس فيها احساس بالعالم اللي حواليها و بتحاول تقدم أي دعم
و ده يخلي الحياة لونها بمبي
لما بقرأ او اسمع في تاريخ المسلمين و اشوف ان اللي بيحصل ده حصل كذا مرة و كل انكسار بيليه نصر كبير بحس ان الحياة لونها بمبي
لما كل يوم اصحى و الاقي اطرافي سليمة و اصطبح بوجه والدي و والدتي في احسن حال و انزل الاقي مشوايري مهمة و مفيدة و بحقق منها اللي عايزه ده بيخلي الحياة لونها بمبي
الخروجات مع الأصحاب و السفر دول برضه بيخلوا الحياة لونها بمبي
لما بقيت بلاقي الناس عندنا في مصر بدأوا يعملوا اعتصامات و بياخدوا حقوقهم زي ماهم عايزين و مش خايفين بحس ان الدنيا بمبي
لما بلاقي ناس اصحابي بدأوا يخطبوا و يتجوزوا و احسنوا الإختيار بإذن الله و الاقي امل في اسر مسلمة جميلة بحسها بمبي خالص
الموضوع لا يمنع ان في منغطات كتير برضه بس انا مقتنع بمقولة و ان كان غالب الظن انها حديث شريف فيما معناه ان المرء بينظر إلى الأمور حوله بما يراه في نفسه
يعني الكئيب (لامؤاخذة) هيشوف كل حاجة كئيبة و المتفائل هيشوفها بمبي و الجدع اللي يقدر يكون متفائل بس يكون موضوعي مش متفائل بعبط
و هلم جرجر بقى
اسف يا أوما...نضارتي سودا حتي الان
:)
تحياتي لكي
Post a Comment