كنت بفكر كدة فى شوية حاجات و اتساءل أسئلة جدلية...فقلت أفكر بصوت عالى...خصوصا بعد موضوع كريم عامر.....!!!ا
يعنى هو اتحبس عشان ازدراء الأديان( التهمة اللى فى الواجهة) و اهانة الرئيس ( التهمة الأهم أكيد )...يعنى بسبب أفكار و كلام ....فقعدت أفكر هو الأنسان بيتحبس ليه أساسا ...يهعنى القانون بيعاقب ليه؟!!!
الأسباب اللى جت فى دماغى سببين رئيسيين ...الأول ردع الشخص عن اللى بيعمله و محاولة تهذيبه و اصلاحه ..و الثانى حماية المجتمع من خطره و جرايمه....ممكن يكون فى أسباب تانية بس ده اللى جيه فى دماغى....!!!ا
طيب نطبق الكلام ده عى قضايا الفكر عموما و قضية كريم عامر خصوصا لو اعتبرنا أن فعلا اتحبس عشان اراءه الدينية مش السياسية.....!!!ا
الانسان اللى عنده أفكار شاذة و غريبة مقتنع فيها حتى النخاع ...هل حبسه حيردعه عن فكره...و لا بالعكس ممكن يديه حافز أكبر أنه يثبت على موقفه و يعيش فى دور البطل المضطهد ...و يديه الدافع أنه يكتب و ينشر أكتر عشان يعرض أفكاره..حتى لو فى السجن...حتى لو بيتعذب....!!!؟؟؟؟ا
طيب لو بصينا من ناحية حماية المجتمع....هل حبس شخص بسبب فكره بيحمى المجتمع...و لا لأ؟؟؟...و لو حتى فى نسبة ..اللى بيحصل أن الانسان اللى بيتعمله قضية...بيكون عنده منبر أعلى يتكلم من خلاله لكل المجتمع ...لأن الموضوع بيكبر و الصحف بتكتب و التلفزيون يعرض فالناس تسمع أكتر عن أشخاص كان ممكن يمروا عليهم مرور الكرام.... و عن أفكار كانت ممكن تموت مع الوقت أو تمر مع صاحبها مرور عابر!!!ا
يعنى التساؤل من الأخر ...هل القضايا و الحبس و الحوارات دى كلها فى قضايا الفكر بمختلف أنواعه ليها أى فاعلية أو فايدة حقيقية..؟؟
و هل ممكن يكون فى حلول تانية من حوار بالحجج المضادة أو حتى التجاهل خصوصا فى حالة زى كريم عامر اللى لو بصينا على عدد الناس اللى كانوا متابعين كلامه و نسبتهم للشعب كله حنلاقى نسبة ضئيلة تكاد تكون مهملة من مرتادى مدونته خصوصا و مواقع الأنترنت عموما...و غالبا حيكونوا ناس ليها فكر برده مش مسيرين و خلاص...يعنى مكانش عنده قناة خاصة و لا جريدة موجهة مؤثرة فى الملايين مثلا ....!!ا
سؤال تانى دار فى ذهنى بخصوص كتابات كريم عامر خصوصا اللى موجهة ضد الأزهر ....هل حد فكر يقرا الكلام ده بحيادية فعلا و يحلله....يمكن يكون فى دوافع و أخطاء موجودة ممكن تتصلح...يعنى على سبيل المثال هو شايف أن الأزهر لعنة فى كل وقت...و أنه لما سابه معرفش يدخل جامعة تانية لأن شهادته مش معترف بيها.... و شايف ان ده ضد المواطنة!!!.... مشكلة ممكن تكون عند ناس كتير بأشكال مختلفة ...ممكن يكون المقال على بعضه هجوم ضارى على الأزهر بشكل كبير...بس ممكن يتقرى بشكل أقل سطحية يخللى اللى بيقرا يقدر يفهم شوية ايه اللى بيوصل الناس أن أفكارها تبقة منحرفة و شاذة أحيانا و يخليهم عنهم عدوانية و كراهية للمجتمع و البلد فى أحيان أخرى.....!!!
طبعا زى ما قلت فى الأول أنا بس بفكر ....يعنى لا شك أنى بكون مستفَزة من الأفكار الشاذة و المنحرفة....بس الكلام ده كان بيدور فى دماغى... يمكن تكون أفكار مش مترتبة وغريبة... أو أسئلة جدلية ...بس زى ما قلت مجرد تفكير بصوت عالى....!!ا
4 comments:
هو انا مانكرش اني فكرت في الموضوع ه بس مارضيش يلزق في دماغي لفترة طويلة
الصراحة انا مش مقتنع بعقوبة الحبس كده لوحدها لمجرد الحبس من غير ما يكون في فرق توعية جامدة مصاحبة للحالة اللي دخلت الحبس دي علشان تعالج نفسيا (على الأقل) من أثار شذوذها عن قيم المجتمع غير اني الصراحة في قضايا كتير عقوباتها الحبس و هي عقوبات غير مناسبة اطلاقا للجريمة زي قضايا السرقات اللي عقوبتها 6 اشهر مثلا و أنا شاف أمامي قانون الهي و هو لحد السرقة أكثر وعظا و تأثيرا من الحبس مثلا
بالنسبة لقضايا الفكر موضوع الحبس فيها محير جدا يعني الحبس كتير ادي لافكار شهرة و متابعة و ايمان كبير يمكن كان يبقى اقل لو ماتحبسش صاحبها و حجر عليه سواء كان صح أو غلط
زي الشهيد سيد قطب مثلا و الهضيبي التلمساني و نوال السعداوي و غيرهم.
وبرضه بالنسبة لقضايا التنظيمات الاسلامية و مراجعاتها و غيره
الصراحة لازم برضه نتوقف أمام حاجات
1- شكل الانظمة الحاكمة اللي بتتعامل معا الاشخاص دول من حيث اطلاق الحريات مطلقة أو قمع أي رأي معارض أو التعامل باتزان أمام أصحاب الأفكار المختلفة سواء بناءة أو هدامة
2- هوية و عقيدة المجتمع اللي بنشوف فيها الممارسات الفكرية دي يعني مثلا لو شفنا تصرف الكنيسة في العصور الوسطي مع جاليليو و حرقه بتهمة السحر رغم اعتراف الكنيسة بعد ذلك بانها قبل حرقه كانت تعلم مدي صحة فرضياته و نظرياته في موضوع دوران الأرض و تعامل مثلا الدول الاسلامية مع مدعو النبوة أو تعامل المبادئ العلمانية مع أي ثقافة تحمل منهج اسلامي أو كما يدعون بقصره في صورة الديني
3- مدى وعي و ثقافة الطبقة الشعبية (اللي هي الأكبر ) في المجتمعات علشان تواجه سيل الأفكار اللي بتتوارد عليها دي
كلها حاجات متداخلة تخلى الموضوع محير جدا بالنسبة لي
--------------------------------
بالنسبة للأزهر
نظرا لإن الأزهر طاقة روحية قوية و مباشرة لروح الجهاد و الدفاع عن الاسلام و المسملين و كان منارة كبيرة فكان لازم أي حد عايز يطفي الروح دي انه يخرب الأزهر
و طبعا كان ضروري لنظام حاكم زي اللي احنا فيه يسعي لتفريغ الحياة المصرية من أي قيمة ممكن تصحيه ياخد حقه في يوم من الأيام إنه ياخد باله من نقطة زي دي
و تم محاربة الأزهر لحد ما وصل للحالة المزرية اللي هو فيها دي .
فكان من الطبيعي انه زي ما بيظهر تطرف في مكان يظهر التطرف في الاتجاه المعاكس فظهرت أراء تعدت الحديث عن تخريب الأزهر إلى انها تحارب الاسلام في الأزهر زي كريم عامر و غيره (طبيعي يكون في كلامه الصح على سوء حالة الأزهر) و لكن هو خلى ضرر كلامه اكبر من نفعه و علشان الناس تقرا الموضوع ده بحيادية تكون بالوعي اللازم علشان تستخلص النفع اللي فيه و تتلافى الضرر اللي فيه
-------------------------
فرصة كويسة فعلا ان الواحد يفكر مع غيره بصوت عالى في قضايا زي دي
فكرة موفقة
(Y)
howa be basata law 3ashan tohmet ezdera2 el adyan,yeb2a kan awla nawal el se3dawy w el nas ely zayaha yeb2o homa f awel ely yet7akmo bas el mawdo3 mesh kda,el mawdo3 eno besabab afkaro w ketabatoh,bada2et el blog beta3toh tentesher w el articles beta3toh ely kan feha beyhagem el ra2es be kowa,so 3ashan el denya matewla3sh,el 7okoma 2amet bel wageb:S
nas zakeya awwwy el sara7a
رأيى الشخصى
هو عيل عبيط والحكم عبيط زيه كده
معلش انا اسف انى استخدمت اللفظين دول بس هى دى الحقيقة
الواحد لما مش عاجبه حاجه يعمل حاجه من الاتنين
يا يحاول يغير اللى مش عاجبه
يايسيبه خالص ويبعد عنه
هو الأزهر مضايقه قوى كده
كان ممكن يتفاهم من غير شتيمه هو صحيح ماحدش كان هايعبره بس يبقى اسمه بذل أقصى جهده
الحل التانى بقى انه كان يغير تعليمه للتعليم العادى وكان امتحن الاعدادية والثانويه المصرية العامة
لأن التعليم الأزهرى أصعب بكتير من العادى
فهو أكيد كان هايسلك بسرعه فى التعليم المصرى العام
انما هو حب يعمل شوشرة وزيطه وجت على دماغه
والمفروض ان الحبس هايردعه انه يفكر تفكير منحرف
انما اذا عاند هو برضه الخسران
هايتحاكم تانى وهاياخد حكم مضاعف علشان هايبقى عنده سابقه
عاند تالت مره يبقى يظهر هو قرر يضيع حياته هدر
براحته
مافيش قضية هو بيدافع عنها
المشكلة مش فيه هو
المشكله فى الناس اللى بتحاول تخليه ضحية وهو مش ضحية
وشكرا
kimexlilo:
ما هى دى النقطة اللى كنت بفكر فيها ...هدف العقوبة فى حالة زى دى وأثرها و هل ليها جدوى فى الأخر و لا لأ؟!!!ا
و عن قراية الموضوع بحيادية مش قصدى أى حد فى حاجة...أنا قصدى بالأخص الجهات المنتقدة فى حالة أنها فعلا عايزة تتحسن...!!ا
------
mado:
يعنى هو مجرد فرض جدلى أنه اتحبس بسبب دينى ...كنت بفكر على أساسه فى الموضوع عموما...!!!ا
------
حسن محمود:
هى القضية مش الأزهر بس ..هو خبط فى حاجات كتير بشكل بشع ...بس هى النقطة زى ما قلت أنهم عملوه ضحية و نشروا عنه و عرفوا اللى ميعرفش عن حاجة متستهلش....!!!ا
------
تحياتى للجميع
Post a Comment